સુખ નું સરનામુ.. ડૉ.શ્યામલ મુન્શી

સપ્ટેમ્બર 12, 2011 પર 2:39 પી એમ(pm) | Posted in મને ગમતા કવિઓ અને સાહિત્યકારો, મને ગમતા ગીતો | 3 ટિપ્પણીઓ
ટૅગ્સ: , , ,

      મિત્રો, રંગમંચનો  પ્રભાવ સાંપ્રત  સમાજમા  વરસોથી રહ્યો છે. ઘટેલી ઘટનાઓ, વાર્તાઓ, નાટકો, નૃત્યનાટિકાઓ, શેર- શાયરી, કવિતા, ગીત,  ગઝલ   આ તમામ  સાહિત્ય  અખબારોમા, સામાયિકોમા  કે   પુસ્તકાલયોની   વાંચનસામગ્રીમા  જે તે સમયે   અથવા સમય જતા મળી આવતું હોય છે. પરંતુ  એ જ  સાહિત્ય  ની અભિવ્યક્તિ  કે  રજૂઆત જ્યારે  રંગમંચના તખ્તા પરથી થાય છે  ને ત્યારે ..  ! સમાજના બુધ્ધિશાળી વર્ગને તો આકર્ષે છે પણ સાથે સાથે   સામન્ય અને સરેરાશ માનવીને પણ  સાહિત્યના અને   ભાષાના મૂળ,  ઊંડાણ  અને તત્વ સુધી  આવવા મજબૂર કરે છે.    મિત્રો .. પ્રસ્તૃત  વીડિયો ક્લીપમા  જાણીતા કવિ  ડૉ.શ્યામલ મુન્શીનુ આ ગીત  એમનાજ  સ્વરમા મે જ્યારે મુશાયરાના મંચ પરથી સાંભળેલું   ત્યારે જ   દિલને  સ્પર્શી ગયું હતુ  અને  એટલે જ  આ સામગ્રી   મારા પૂરતી ન રાખતા  તમારી સાથે Share   કરું છું.  મિત્રો…    ગીતના  વિષયતત્વનુ બારીકાઇથી ચિંતન  કરવાથી   આપણને આપણો જ   પડછાયો ગીતમા    હૂબહુ  દેખાઇ આવશે.. આ મારો  દાવો નથી.. પણ… વિશ્વાસ છે.. અને  જો  એમ ના થાય તો..   માનજો કે  આપણા    ‘હોવાપણા’  મા કંઇક   ખામી છે.. ગીતનુ શબ્દાંકન  એ એમની સશક્ત કલમ અને કવિત્વનો તો  પૂરાવો છે  જ પણ સાથે  સાથે  ગીતનું સ્વરાંકન  અને એમના અવાજની ખૂબસૂરતી… ક્યા બાત  હૈ.. મિત્રો..  આ ત્રણે વાતનો સમન્વય ત્યારે જ શક્ય બને .. જ્યારે ..  માનવી બંને હાથ જોડી  નતમસ્તકે  મા સરસ્વતીના  ચરણમા  પથરાયો હોય અને મા સરસ્વતીનો હાથ મસ્તક પર ધરાર અડ્ડી ને  હોય…  મિત્રો.. આ  તો  મારા દિલની વાચા છે એટલા માટે  આટલુ લખી ગયો..  બાકી ..    આમ પણ   આ  મુન્શી ત્રિપુટિ  ડો.શ્યામલભાઇ, શૌમિલભાઇ અને આરતીબેન થી  ગુજરાતી સાહિત્યજગત ક્યાં અજાણ્યુ છે..  શ્યામલભાઇના  કાવ્યપઠન પછી  શ્રોતા અને ભાવકોની  દાદ … તમે જાતે જ જોઇલો ને…

ડૉ. શ્યામલ મુન્શી

ગીત 

સુખ નું  સરનામુ આપો….  સુખ નું સરનામુ આપો

જીવનના કોઇ એક પાના પર એનો નકશો  છાપો.

સુખ નું સરનામુ  આપો…….

સૌથી  પહેલા એ સમજાવો   ક્યાંથી નીકળવાનું

કઇ તરફ  આગળ વધવાનું ને ક્યાં ક્યાં વળવાનું

એના   ઘરનો  રંગ  કયો છે   ક્યાં છે એનો ઝાંપો..

સુખ નું સરનામુ  આપો…….

ચરણ   લઇને   દોડું  સાથે   રાખું   ખુલ્લી  આંખો

ક્યાંક   છુપાયું   હોય   આભમાં  તો  ફેલાવું પાંખો

મળતું   હો  જો   મધદરિયે  તો વહેતો મૂકું   તરાપો

સુખ નું સરનામુ  આપો…….

કેટલા    ગાંઉ,   જોજન,   ફલાંગ કહો   કેટલું દૂર

ડગ   માડું..   કે મારું  છલાંગ…. કહો   કેટલું  દૂર

મન   અને   મૃગજળ   વચ્ચેનું અંતર કોઇ માપો

સુખ નું સરનામુ  આપો…….

 (વીડિયો સૌજન્ય :  શિકાગો આર્ટ સર્કલના ભંડોળ માંથી )

Advertisements

ગઝલ મહેફિલ….’મિસ્કીન’ સાથે

સપ્ટેમ્બર 6, 2011 પર 5:41 પી એમ(pm) | Posted in મને ગમતા કવિઓ અને સાહિત્યકારો | Leave a comment
ટૅગ્સ: , , ,

મિત્રો,  જો તમે શિકાગોલેંડની( Chicago.US.)   આસપાસના  વિસ્તારમા હો .. તો  આ મોકો  ચુકી ના જતા ..

ત્યારે એની ખબર પડે છે…

ઓગસ્ટ 29, 2011 પર 3:22 એ એમ (am) | Posted in ભરત દેસાઇ ' સ્પંદન ', મારી ગઝલો.. | 8 ટિપ્પણીઓ
ટૅગ્સ: , ,

     મિત્રો, ગઝલ  વાંચો એ પહેલા   એની પૂર્વભૂમિકા  જાણશો  તો  કદાચ એની Impact  વધારે આવશે ..  ડોલર કમાઇ લેવાની મેરેથોન દોડના ટોળામા  હું  પણ હતો.. જાતનો વાણિયો.. વેપારતો જાણે  અમારો જન્મસિધ્ધ હક્ક..  અમેરિકામા કોઇ ધંધાકીય મોટા સાહસ કરું  એવી  મારી પાસે  ના તો  એવી મૂડી…  ના બુધ્ધિ…  ના તો  હિંમત…તો પછી  બાકી શું  રહ્યુ… મૂળ  આપણો હિન્દુસ્તાની કટલરી સ્ટોર કે  ગલીનુક્કડનો સુધરેલો પાનનો ગલ્લો.. જે અંહી અમેરિકાની ભાષામા Convenient Store   કહેવાય.. એવું નાનકડું સાહસ  લઇ બેઠો.. …. અમેરિકામા કદાચ રોજબરોજનું  હોઇ શકે પણ  મારા જીવનની  એ મોટી  ઘટના …  સાંજનો   ખાસી અવરજવર હોય એવો  સમય હતો…  બે આફ્રિકન Store  મા  Customer તરીકે આવ્યા..   ક્રિકેટના મેદાન પર મેચ  શરુ થતા પહેલા અંપાયર  પીચનુ નિરીક્ષણ  કરે  લગભગ  એ જ  ખૂબી થી બંન્ને શ્ખ્સીયત  ફરીને આખા Storeની   મુલાકાત લઇ લીધી  અને પછી મારી  પાસે Counter સામે આવીને  ઊભા ત્યારે મે અમેરિકન ધંધાકીય   રિવાજ પ્રમાણે  પૂછ્યું ..” You guys need any help..? ” Counter ને લગભગ અડીને  Storeનો  મુખ્ય દરવાજો  હતો .   બસ….    આંખના પલકારામાં એકજણે  Store નો દરવાજો બંધ કર્યો અને બીજાએ એના પેંટના ખિસ્સામાંથી રિવૉલ્વર  કાઢી  મારા કમરના ભાગે રિવૉલ્વર   અડાવીને  રજિસ્ટર ખોલવા માટે કહ્યું…  એણે મને રજિસ્ટર ખોલવાનું કહ્યુ  હતું .. પણ મે   ગલ્લામા હતા એ બધાજ ડોલર  એક પણ ક્ષણના  વિલંબ વગર  એના હાથમાં મૂકી દીધા અને તદઉપરાંત  ગલ્લો (રજિસ્ટર)  બતાવીને કહ્યું  ” Now  I don’t have any more… ” જલ્લાદના મનમા  રામ વસ્યો હશે કે શું ખબર નથી … પણ .. કશી દલીલો વગર એને મને  ટી-શર્ટના  કોલરથી  પકડી  Store ની અંદરના ભાગમા  આવેલી    Pantryમા  … કોઇપણ્ જાતના શારીરિક નુકશાન વગર પૂરી દીધો.. અઢી મિનિટના  આ નાટકીય ખેલમા .. જાન બચી લાખો પાયે.. મિત્રો. જાણકારો.. અને સગાસંબધીઓ ને ક્રમસહ સમયાંતરે જાણ થતી ગઇ.. સરેરાશ બધાનો એકજ  મત કે એમા આટલો હોબાળો મચાવાની જરુર નથી .. આ બધુ અહીં રોજનું છે…  મારો બધાને એક જ જવાબ હતો.. ” જાતને અનુભવ થાય ને! ત્યારે એની ખબર પડે છે …”  મિત્રો.. આજ વાત નવી ગઝલનો  મત્લા થૈ ગયો… બાકી પછીતો કવિકર્મ આવે છે … (ઘટના  Oct. 18.2010 ના દિવસે બની ..આ  ગઝલ  Aug.2011 મા લખાઇ છે ..  વાતો જુની છે પણ!  યાદ તો આવે ને !

ગઝલ

જાતને   અનુભવ   થાય   ને !    ત્યારે  એની  ખબર  પડે  છે

ઘાત   માથેથી    જાય ને !    ત્યારે   એની   ખબર   પડે    છે

બેઉ    ના      સરખા   રંગ    ને     બંન્ને   સરખી     બિરાદરીના

કાગ  –  કોયલ       ટહુકાય ને !   ત્યારે   એની   ખબ ર પડે છે

હોય   બધુ     રાબેતા    મુજબ    એની     તો  ભૈ   મજા  મજા છે

કંઇક     અજુગતું     થઇ   જાય ને !    ત્યારે   એની ખબર પડે છે

તાજ.. ને .. આ.. મુમતાઝ ને ‘લૈલા-મજનું’ ખબર બ..ધી પણ

પ્રેમમાં     દિલ     તરડાય    ને !     ત્યારે     એની   ખબર પડે છે

ખરખરો     કરવા     કોઇ     મૈયતમાં   આપ્યો    રડી     દિલાસો

મોત…ઘરમાં     પડઘાય ને !     ત્યારે    એની   ખબર   પડે છે

ગાલગાગા,   શબ્દો,    વિચારો ,..’સ્પંદન’    પૂરતું   નથી…. પણ

તું    ગઝલમાં      ઠલવાય    ને !   ત્યારે    એની    ખબર   પડે છે

કોઇ થ્રીલ માટે વાત ઉપજાવેલી નથી વાત  સંપૂર્ણ સત્ય છે હા!   Pic. વાતને અનુરુપ ગૂગલ માંથી લીધુ છે 

Old is Gold…

ઓગસ્ટ 16, 2011 પર 7:45 એ એમ (am) | Posted in મને ગમતા કવિઓ અને સાહિત્યકારો | Leave a comment
ટૅગ્સ:

      મિત્રો,  સમય સાથે   ‘તાલસેકદમ’ ભરનારો  ભારતવર્ષનો   નાગરિક   ‘Professional World’ ના  કહેવાતા બધા જ  ક્ષેત્રોમા  ક્યાંકને ક્યાંક  પોતાનું સ્થાન  જમાવી ચુક્યો છે…પોતાની  વ્યવસાયિક કારકિર્દી અને કહેવાતા   સારા ભવિષ્યના તમામ મનોરથ પૂરા કર્યા પછી પણ… ક્યાંક  દિલના કોઇ ખૂણામાં  કોઇ વાત ડંખે… ક્યાંક કોઇ વાતની  ખોટ મહેસૂસ થાય..કહેવાતા તમામ ભૌતિક સુખોને મુઠ્ઠીમા બાંધી લીધા પછી પણ … જો એમ થાય કે … “કદાચ મારી ગઇકાલ સારી હતી..”   મને થોડા   શેર યાદ આવે છે….

સાવચેતીથી  કદમ ઉંચકી અને  ચાલ્યા પછી

ક્યાંક પહોંચો  અને છંતાય હાશ કહેવાતુ નથી

ડો. મધુમતી મહેતા

મને ખુદ ને જ મળતો  હું  હજી  પણ  ત્યાં જ ઊભો  છું

ને વરસાદે    પલળતો હું  હજી  પણ  ત્યાં જ ઊભો  છું

તને  આગળ  ને આગળ હું સતત જોયા   કરુ  અથવા

પ્રયાસોમા  કથળતો    હું  હજી  પણ  ત્યાં જ ઊભો  છું

શોભિત  દેસાઇ

આઘા ક્યાં છે સગાસંબધી ક્યાં મિત્રોની ખોટ પડી છે

કિંતુ બસ  એક લીલીસૂકી  લાગણીઓની  ખોટ પડી છે

ખલીલ ધનતેજવી

         મિત્રો, આ તમામ વાતોનો  સંદર્ભ  તો વીતેલી ગઇકાલ અને આંતરિક  મનની શાંતિ ..આ બે વાતો પર આવીને અટકે છે અને આ વાતના એક પ્રયાસરુપે  પણ   નીચે આપેલી આ વીડિયો ક્લીપ  અચૂક  માણવા જેવી છે.. Philadelphia ના  રહીશ,  ગુજરાતી સાહિત્યના ઉંડા  અભ્યાસી અને ભાવક   સૂચિબેન વ્યાસ પોતે પણ  સારા લેખિકા છે.. ટૂંકી વાર્તાઓ અને  એમના લેખો માણવા લાયક હોય છે..જીવનના મર્મની  અને  ગહન વાતો  એ એમના લેખનનું  જમા પાસું  છે … બાકીની વાતો  એમની  અદાકારીમા સાંભળીયે…

વીડિયો સૌજન્ય: ચિરાગ પટેલ  Philadelphia

આદમ થી શેખાદમ સુધી…

ઓગસ્ટ 8, 2011 પર 4:53 એ એમ (am) | Posted in મને ગમતા કવિઓ અને સાહિત્યકારો, મને ગમતી ગઝલો.. | 2 ટિપ્પણીઓ
ટૅગ્સ: , ,

          મિત્રો, મને ગમતા શાયરો  પૈકીના એક  જનાબ શેખાદમ આબુવાલા…  બોલચાલની ભાષાને ગઝલની નાનકડી પંક્તિમા શણગારવાનું  કામ કરનાર શાયરોમાં શેખાદમ સાહેબનું સ્થાન મોખરે છે એમ કહી શકાય.. જો કે  મને એમને જોવા, મળવાનો કે સાંભળવાનો  મોકો મળ્યો નથી…  આવો   એમની એક ગઝલને માણીયે…

 

 શેખાદમ  આબુવાલા 

માનવી  ને   આ   જગત  આદમથી  શેખાદમ સુધી !

એ   જ   દોરંગી    લડત    આદમથી  શેખાદમ સુધી !

રૂપનું    રંગીન    ગૌરવ,   પ્રેમનો    લાચાર    હાલ-

એ  જ  છે   લાગી  શરત    આદમથી  શેખાદમ સુધી !

મોતને     શરણે    થવામા   સાચવે    છે      રમ્યતા

જિંદગીની    આવડત    આદમથી  શેખાદમ  સુધી !

બુધ્ધિ     થાકી    જાય     તો    લેવો   સહારો    પ્રેમનો

સારી   છે  આ  બૂરી    લત  આદમથી શેખાદમ સુધી !

મોતનું    બંધન,    છતાં     કરતો    રહ્યો   છે   માનવી,

જિંદગીની       માવજત      આદમથી  શેખાદમ સુધી !

(શબ્દ સૌજન્ય: ગુજરાતી પ્રતિનિધિ ગઝલો – સંપાદક:  ચિનુ મોદી)

  (ફોટો સૌજન્ય:  ફેશબુક  આલ્બમ..  “આ છે હિન્દુસ્તાની” )

હું ને મારી ગઝલો..

ઓગસ્ટ 1, 2011 પર 5:41 એ એમ (am) | Posted in ભરત દેસાઇ ' સ્પંદન ', મારી ગઝલો.. | 4 ટિપ્પણીઓ
ટૅગ્સ: , , , , ,

           મિત્રો,  વાત  અને  વિડીયો  એકાદ વરસ જુની છે.. યાદો ને  દિલમા અને પ્રસંગોને  કેમેરામા  સાચવવાની  મારી   આદત વરસો જુની છે. અને એમાનું  કંઇક…  ક્યારેક   જીવનનું  સંભારણું બની જાય છે …  ગઝલકાર ડૉ. અશરફ ડબાવાલાની  કાવ્ય પ્રવૃતિને બિરદાવવા  શિકાગો આર્ટ સર્કલના  કાર્યકરો દ્વારા  તેમના સન્માનમા  આયોજીત   મુશાયરામાં  હું પણ  મંચનો  નાનકડો  હિસ્સો હતો. ગુજરાતી  સાહિત્યના મુશાયરાના મોટા ગઝલકારો, ગીતકારો અને કવિઓ  શ્રી. ચિનુ મોદી,  શ્રી. અનિલ જોષી,  શ્રી. વિનોદ જોષી,  શ્રી. કૃષ્ણ દવે,  ડૉ.શ્યામલ મુન્શી,  સૌમિલ મુન્શી,  આરતી મુન્શી.  નોર્થ અમેરિકન લિટરરી ઍકેડેમીના  પ્રમુખ  શ્રી. રામભાઇ ગઢવી, સાહિત્ય વિવેચક શ્રી.મધુસૂદન કાપડિયા,  જાણીતા વાર્તાકાર શ્રી મધુરાય, લેખિકા   સૂચિબેન  વ્યાસ,  ચંદ્રકાંત શાહ અને  હા.. ડૉ. ડબાવાલાનું  સન્માન હોય અને  જાણીતા કવિયત્રી અને એમના  પત્ની  ડૉ. મધુમતી  મહેતા ના હોય એવુ બને…?  મિત્રો,  આ તમામ  દિગ્ગજ   સાહિત્યકારોની  હાજરીમા  કાવ્યપઠન  કરવાનો અવસર મળ્યો..    આ વાતને સંભારણું  કહેવાય  કે  નહીં ..?  તમે શું કહો છો….?

(1)

બોલુ  ના  ને  મૌન રહું ! તો વાંધો  શું છે ?

તો  ય  તમને  પ્રેમ  કરું ! તો વાંધો શું છે ?

બામુલાજા,  બાઅદબ !  ભૈ વટ  પડતો’તો

સ્વપ્નમા  સુલતાન બનું ! તો વાંધો શું છે ?

કોઇ    સાંજે     મેઘધનુષી    મદહોશીમા

મયકદામા  જામ    ભરું ! તો  વાંધો શું છે ?

ક્યાં  મળે  છે  રોજ  આવા અવસર   યારો

હું  તમારી   જેમ   હસુ !  તો  વાંધો શું છે ?

શબ્દને   શણગારવા  ની   ધુનમા ‘સ્પંદન’

જો ગઝલ  બે ચાર લખું ! તો વાંધો શું છે ?

(2)

હાજરી    હોય   અંહી  જો   તમારી    ફરક તો પડે

હોય    સંગત    સનમ  ની  ગુલાબી ફરક તો પડે

લાગણી,  ભાવના,  યાદ   સુધ્ધા   શમી જાય પણ

બસ  રહી    જાય   કોઇ    નિશાની    ફરક   તો પડે

લો   તમારી   બધી   વાત  માની ગયા પણ…તમે

વાત    ક્યારેક     માનો    અમારી     ફરક    તો પડે

જિંદગી   છે!    બધી     જાતના   ખેલ    કરવા    પડે

તું    બની     જાય     સારો    મદારી   ફરક   તો પડે

એ ગઝલ,   ગીત,   કવિતા   કશું પણ   હશે ચાલશે

શબ્દની     જો     અસર   થાય   ધારી ફરક તો પડે

આપવા   છે   ખુલાસા    વિગતવાર     મારે     તને

જાણકારી     તને    હોય    સાચી      ફરક    તો   પડે

ભરસભામા      ગઝલની     રજૂઆત   જો    તું     કરે

દાદ   ‘સ્પંદન’     મળે    જો   બધાની   ફરક   તો   પડે

પૂછવાનું નૈ… કૃષ્ણ દવે

જુલાઇ 25, 2011 પર 4:21 એ એમ (am) | Posted in મને ગમતા કવિઓ અને સાહિત્યકારો | 1 ટીકા
ટૅગ્સ: , , ,

           મિત્રો, ગુજરાતી  મુશાયરાના  મંચ પર  જેમણે એક અલગ  ચીલો ચાતર્યો છે…  સાહિત્યની  ઊંડાઇ  અને  ગહન વાતોને  બદલાતા જમાનાની  તાસીરને અનુરૂપ  Sugarcoat   કરીને  સમાજ  અને નવી પેઢી સમજે .. એનું  ચિંતન કરે .. અને  આપણા સંસ્કારો,  આપણી  સભ્યતા અને આપણી ખુદ્દારીનું  મનોવિજ્ઞાન   લોકભોગ્ય બને  એજ હેતુસર  જેમણે    પોતાની સર્જનપ્રવૃતિને   વારંવાર   ચાકળે  ચાઢાવીને   ઘાટ   આપ્યો  છે  અને એક સુંદર સર્જન  સમાજને  આપવાનો સતત પ્રમાણિક પ્રયત્ન કર્યો છે ….  હું વાત કરું છું  એવા એક  સર્જકની .. જેમણે  રિઝર્વબેંકની  crispy   ચલણી નોટો   ગણતા ગણતા  પણ ( વ્યવસાયિક રીતે  રિઝર્વબેંક ના    Cashier  તરીકે  છેલ્લા 29 વરસથી   અમદાવાદમા  સેવા આપી રહ્યા છે)સાહિત્ય અને કવિતાના  વિચારો સ્ફુરે… ને …ત્યારે  મિત્રો.. મારે, તમારે અને  બધાએ…   સંત્રી બની  સાદ  આપવો  પડે…….. સાવધાન…….  ખબરદાર…….    બામુલાહિજા …….. હોંશિયાર………  આપ સૌના  મનોરંજન માટે…….. ખુદના  નિજાનંદ માટે…….   મુશાયરાના  મંચની   શોભા.. એવા   કવિ  અને ગીતકાર  માનનીય  શ્રી. કૃષ્ણ દવે …  પધારી  રહ્યા છે….છે એ….એ…..એ…

કૃષ્ણ દવે  

ગીત ….

 ઉગાડે   એમ     કદી   ઉગવાનું   નહીં,

આપણે તો આવળને બાવળની જાત.

ઉગવાનું   હોય ત્યારે  પૂછવાનું  નહીં!

ધગધગતા   તડકાના   પેગ  ઉપર  પેગ   અને   ઉપરથી   આખું     વેરાન

નિંરાતે બેસી   જે   ભરચક   પીવેને   એને.. પાલવે  આ  લીલા..  ગુમાન

          રોકે     કદાચ….      કોઇ       ટોકે        કદાચ

             તોયે  મહેફિલથી   કોઇ દિવસ ઉઠવાનું  નહીં !

                                                                           ઉગવાનું   હોય…….

આપણેતો એણી  એ  સમજણ શું રાખવાની, મસ્તીમાં  ખરવું કે ફાલવું ?

આપણાતો લીલાછંમ્ લોહીમા  લખેલું છે  ગમ્મેતે મૌસમમા  મ્હાલવું

 હસવું     જો  આવે   તો હસવું    બેફામ

  અને આંસુ જો આવે તો લુંછવાનું નહીં!

                                                                           ઉગવાનું   હોય…….

ઉંડે ને ઉંડે જઇ .. બીજુ શું કરવાનું ?ધરવાનું આપણું જ ધ્યાન

પથ્થરને  માટીના ભૂંસી ભૂંસી ને ભેદ     કરવાનું લીલું તોફાન

 દેખાડે    આમ.. કોઇ     દેખાડે   તેમ ..

    તો ય ધાર્યુ નિશાન  કદી ચૂકવાનું  નહીં!

                                                                     ઉગવાનું   હોય…….

(વિડીયો સૌજન્ય: શિકાગો આર્ટ સર્કલના   ભંડોળ માંથી)

સમજ્યા વગર …ખલીલ ધનતેજવી

જુલાઇ 23, 2011 પર 2:53 એ એમ (am) | Posted in મને ગમતી ગઝલો.. | 1 ટીકા
ટૅગ્સ: , ,

મિત્રો,   મને  ગમતી ગઝલો પૈકીની એક ગઝલ.. અને  આમ પણ  હું ખલીલ સાહેબ માટે  થોડો વધારે પક્ષપાતી રહ્યો છું .. લાંબી  વાતો કર્યા વગર  આવો સીધી ગઝલને  માણીયે..

ગઝલ….

ખલીલ ધનતેજવી…

લય  વગર,  શબ્દો વગર,  મત્લા  વગર

હું  ગઝલ  લખતો  રહ્યો   સમજ્યા વગર

તેં    તો    તારો   છાંયડો    આપ્યો   મને

હું   જ   ના   જંપી  શક્યો   તડકા   વગર

કેદ   છું   ભીંતો    વગરના    ઘરમા     હું

સંત્રી  પણ   ઊભો    છે  દરવાજા  વગર

સરહદો     સૂની      હશે      તો     ચાલશે

શ્હેરમાં    ચાલે    નહીં    પહેરા      વગર

મોરને    કો’    બાજપક્ષી     લઇ      ગયું

સીમ   સૂની     થઇ   ગઇ    ટહુકા  વગર

કોક     દિ’     દીવો    પવન   સામે   મૂકો

કોક  દિ’  ચલાવી  લો  અજવાળા   વગર

(શબ્દ સૌજન્ય:    ખલીલ  સાહેબના  ગઝલ સંગ્રહ  ‘સારાંશ’   માંથી)


એ પણ સાચું..આ પણ સાચું

જુલાઇ 18, 2011 પર 4:38 એ એમ (am) | Posted in મને ગમતી ગઝલો.. | 1 ટીકા
ટૅગ્સ: , ,

મિત્રો,  (રાજેશ વ્યાસ)  મિસ્કીન  સાહેબની મને ગમતી ગઝલો પૈકી ની  આ એક ગઝલ  ઘણા વખતથી  બ્લોગ પર મૂકવાનુ વિચારી રહ્યો હતો.. આ  સાચું  અને  આ  ખોટુ..  આ  બાબત ને બયાન  કરવી  હોય તો કદાચ  બહુ સહેલાઇથી   આલેખી  શકાય..  પણ    આ અને   પેલું બેઉ  સાચું  એમ જ્યારે   પ્રતિપાદિત  કરવુ હોય.. ત્યારે સમર્થ   દાવા દલીલોનો  પૂરો  અવકાશ  રહે છે.  મિસ્કીન સાહેબે  આ વાતને   ગઝલમા આબેહૂબ   નિભાવી છે……  બહોત  અચ્છે … મિસ્કીન .. ક્યા..બાત હૈ..


રાતદિવસ  કૈ  લાગે  હરપળ એ પણ સાચું  આ પણ સાચું

અંધારે આ  કેવી ઝળહળ !  એ  પણ સાચું  આ પણ સાચું

ભીતર શું  ય ગયું દેખાઇ ?  ભણતર સઘળું  ગયું ભુલાઇ

કહેતો ફરું છું સૌ ને આગળ  એ પણ સાચું  આ પણ સાચું

અપમાનિત  કે  સમ્માનિત  હો  બેઉ  ખેલ છે  બંને ખોટાં

કાં તો સ્વીકારી લે   હરપળ  એ પણ  સાચું આ પણ સાચું

સપના માંથી જાગ્યો જ્યારે  એ પળમાં મૂંઝાયો   ભારે

અંદર- બાહર  આગળ પાછળ  એ પણ સાચું આ પણ સાચું

કોઇ  ‘કાલ’  મા  શું  બંધાવું ?  કેવળ  ખળખળ વહેતા  જાવું

‘મિસ્કીન’ આનું નામ છે અંજળ..  એ પણ સાચું આપણ સાચું

કોણ અંહી કોનું ને ક્યાં  લગ ?  સઘળું નિશ્ચિત  છંતાય લગભગ

 ‘મિસ્કીન’ એનું નામ છે  અંજળ.. એ પણ સાચું આપણ  સાચું

(શબ્દ સૌજન્ય:  શબ્દ સૂરને મેળે  ગુજરાત સમાચાર  પૂર્તિ)                                                                                                      (ફોટો સૌજન્ય : મિસ્કીન સાહેબના ફેશબુક Profile  માંથી)

મૌસમ હૈ આશિકાના ઐ ..દિલ

જુલાઇ 12, 2011 પર 4:50 એ એમ (am) | Posted in મારા ગીતો.. | 1 ટીકા
ટૅગ્સ: , ,


         મિત્રો,  ગુજરાતમા લગભગ  બધે  જ   વરસાદનો આરંભ થઇ ચુક્યો છે..   સતત ગરમી અને ઉકળાટ  પછી વાતાવરણમા    ક્રમસહ  ઠંડક અને પ્રકૃતિમા માદકતા પ્રસરી રહી છે.. ભીંજેલી  માટીની સોડમ  હું  હજી પણ  માનસિક રીતે અનુભવી  રહ્યો છું .. ઝરમર  કે ઝાપટા -ઝુપટીનો  વરસતો વરસાદ .. કહેવાતી  હિન્દુસ્તાની  રાજાશાહી.. લારીગલ્લા પરની  ટોળાશાહી   અને .. હું …. તમે … ને  આપણે…  બધા  થોડેઘણે  અંશે    આવી  મૌસમમા   રસ રુચિ  અને  મનગમતી  પ્રવૃતિનો  ખરા  અર્થમા  Enjoy   મેળવવા    આતુર  રહ્યા છે .. મન ગમતી પ્રવૃતિ માટે પણ એક અલગ  પ્રકારની માનસિકતાની .. અલગ  મિજાજની .. અલગ  વાતાવરણની …  સાથી  સંગાથી  વિચારોની  તાલમેલ હોય એવા  મિત્રોની.. આ તમામ માનવસહજ  સ્વભાવની  ખાસિયત છે ..  મિત્રો  વાત પૂરી કરું ..  મારા  Computer Desk  ની બાજુમા  વાગતુ  iPod dock  કોઇ ગીત લહેકારી  રહ્યુ છે….. મૌસમ હૈ  આશિકાના  ઐ ..દિલ .. કહીંસે ઉનકો.. ઐસેમે..ઢૂંઢલાના….

ગીત….



મધરાતે      ઝબકીને  બારીમા  જોયું    ત્યાં  સડકો  તો સુની ને ધોધમાર  વર્ષા

ભમ્મરીયા વાદળ..ને..વાદળમા  વીજળીને વીજળીના  તાર  એવા  ચમક્યા

 મારા ભીતરની  રોમ રોમ

ત્યાર પછી  ભડક્યાતા

                                              તારી.. જ    યાદોના  સણકા ……………………….

દુર  દુર ડાઘિયા બાળ સહજ  રડતા અંધારે  આગિયા  સરનામું  પૂછતા

વડની વડાઇ પર  ઘુવડના  છોરાં.. એ…      રજવાડી    ઠાઠમા રમતા

 મઘમઘતા વાયરા   ભેગા થયાને  પછી  ટોળા  સંગ  વાતોએ     વળગ્યા….

મારા ભીતરની  રોમ રોમ

ત્યાર પછી  ભડક્યાતા

                                         તારી.. જ    યાદોના   સણકા ………….

દિલની  કોઇ વાત   જાણે ઘૂઘવતા  સાગરમા સુનામી  મોંજા   થઇ   ઉછળી

ભીંજેલી     માટી એ    સોડમ  પ્રસરાવી મારી આંખોની  ઉંઘ   પછી  વણસી

વેણુના નાદસમ…     ઢોલકના  તાલસમ..     મલ્હારી  રાગો જ્યાં   રણક્યા..

મારા ભીતરની  રોમ રોમ

ત્યાર પછી  ભડક્યાતા

                                       તારી.. જ    યાદોના  સણકા ……………………..

« અગાઉના પૃષ્ઠઆગામી પૃષ્ઠ »

Blog at WordPress.com.
Entries and comments feeds.

%d bloggers like this: